DU KABA NBAN LA HTE JAPAN DU MYU SHA NI HKRUM

2013 ning April 5 ya shana hkying (6:30 pm - 9:00 pm) Japran mungdan, Tokyo mare kaba kaw Jinghpaw Wunpawng Amyu Sha Hpung (KNO - Japan) kawn woi awn let, Japan du Amyu sha ni hte Du Kaba N'ban La (KIO Tingnyang Up malai, UNFC Ningbaw) hte Jan, kaga Du Salang (2) shang lawm let hkrum zup bawngban hpawng lamang hpe a ngwi a pyaw hte galaw awngdang la lu sai lam shiga na chye lu ai.

Ndai hpawng lamang hta Du Kaba N'ban La hku nna, Kanu Mungdan kata hta Amyu sha ni ta tut hkyak hkyak byin hkrum hkra shajang nga ai mung masa mabyin lam yan ni hte matut nna Amyu sha ni a shawng lam mung masa masing myit yaw shatawng shada da ai lam ni, Buga rawt jat galu kaba lam ni hta Panglung Ga Shaka Laika hte maren, tengman jet ngang ai hte Mung masha dat kasa uphkang masa (Federal Democracy) Munghpawm Mungdan gaw de lu yang sha she Simsa ngwi pyaw ai Awmdawm Wunpawng Mungdan hpe gaw de awngdang la lu na re lam, Mungdan kata laknak lang ai (UNFC) Mung masa wuhpung (11) hte seng ai lam ni yawng hpe ginchyum nna, mabyin masa ningmu lam amyu myu hku azin ayang tsun sanglang dan lai mat wa sai lam hpe mung na chye lu ai.

Buga kaw nga ai Amyu sha ni hte Maigan Mungdan shara shagu kaw chyam bra shajang nga ai amyu sha ni yawng, lashum shawt laba pawt myit hkrum mang-rum lahkrip ra ra amyu sha lam yan hta shang lawm ap nawng shakut shaja sa wa shajang ra nga ga ai nga, n-gun mi alu shatsam mungga tsun lai mat wa sai lam na chye lu ai.

Sa du shang lawm shajang ai amyu sha ni yawng mung myit su myit rawt let, tinang chye mayu ai lam yan ni hpe San- Htai lamang hpe mung galaw la lu hte n ai hkrum zup hpawng hta Japan du myu sha ni marai (30) jan sa du shang lawm wa sai lam hpe mung na chye lu ai.

HPYEN YEN NI A MATU MALAYSIA KAW ALU TAM

Malaysia Mungdan du Wunpawng Myusha ni kawn Malaysia kaw du nga ai myen mungdan kata na myu bawsang ni hte jawm bawng nna Jinghpaw Mung Majan a majaw hprawng yen hkawm ra nga ai Hpyen Yen Tsin Yam ni a matu alu tam ai lamang hpe Malaysia mungdan, Kaula Lumpur mare kaba na Chinese Assembly Hall kaw March (29) ya shani galaw lai wa sai lam shiga na chye lu ai. N dai lamang hta Hpyen Yen Tsin Yam ni a matu alu tam ai hku nna Htunghking malu masha dut ai lam, Myu bawsang ni a Htunghking ka manawt ai lam ni hpe galaw lai wa sai lam, Slg. Patrick Yaw Htoi kaw nna du sa ai shawa masha hpe ya hkyak hkyak byin nga ai Jinghpaw Mung kata na majan lam ni hpe powerpoint hte htawng madun tsun sang lang dan lai mat wa sai lam hpe na chye lu ai. N dai lamang hta UN Rung na magam gun ni, Malaysia mungdan na Shiga dap ni hkan na shi ga la ai ni hte Malaysia du myen mung kata na myu bawsang ni hkum hkum ra ra sa du shang lawm lai wa sai lam hpe na chye lu ai. Sa du ai shawa masha yawng (1,000) jan ai lam hpe mung na chye lu ai. Matut nna myu bawsang ni de na lit nga salang ni hte Malaysia mungdan na Shiga lai ai hpung ni hte hkrum shaga (Press Conference) ai lam hpe mung galaw la lu sai lam hpe na chye lu ai.

SYDNEY KAW THEIN SEIN HPE N GUN MADUN

Australia Mungdan de du nga ai Myen gumsan magam Thein Sein hpe Australia mungdan du Jinghpaw Wunpawng Myusha ni kawn March (19) ya shani n gun madun ninghkap lai wa sai lam shiga na chye lu ai. Australia mungdan a mare daju rai nga ai Sydney mare kaba de du wa ai myen mung gumsan magam Thein Sein hpe Sydney mare na Department Of Foreign Affaires And Trade shawng kaw Myusha ni kawn sa du n gun madun ninghkap lai wa ai re lam na chye lu ai.

AUSTRALIA KAW THEIN SEIN HPE N GUN MADUN NINGHKAP

Australia Mungdan kaw du nga ai Jinghpaw Wunpawng Myusha ni hte laga myu bawsang ni jawm pawng nna myen mung gumsam magam Thein Sein hpe March (18) ya shani n gun madun ninghkap lai wa sai lam shiga na chye lu ai. Myen mung gumsan magam Thein Sein Australia mungdan kaw du nga ai ten ya na zawn Australia mungdan du myu sha ni kawn sa du n gun madun ai re lam, n gun madun ai lam hpe Australia, Canberra na Myen Hkring Mang Rung hte Australia Paliment shawng ni kaw sa du n gun madun ninghkap lai wa sai re lam na chye lu ai. N dai n gun madun ninghkap ai lamang hta masha n gun (100) hkat sa du shang lawm lai wa sai lam hpe mung na chye lu ai.